Чистайда «Яшьлек» пляжы
Чистайның яр буе төзекләндерелә. Бүгенге көндә шәһәрлеләр «Яшьлек» пляжына ял итәргә киләләр, биредә коенырга , шулай ук кызынырга мөмкин. Җәйне кая үткәрергә кирәклеге хакында безнең белешмәлектә укыгыз.
Чистайда «Яшьлек» исемле бердәнбер пляж бар. Бүгенге көндә анда күләмле эшләр алып барыла.
Бу хакта һәм шәһәргә аның нинди йогынты ясавы турында без «ГрейтСтрой» предприятиесе җитәкчесе Илшат Шәрифуллиннан белештек.
Аның сүзләреннән аңлашылганча, баскычтан караганда бу –сезонлы ресторан, биредә бию мәйданчыгы бар. Сул яктан таулар белән аквапарк күренә.
–Безнең максат – шәһәрлеләр һәм кунаклар өчен кызыклы һәм сыйфатлы ял оештыру, – дип сөйли Илшат Әгъләм улы. – Эшләр ике этапта үткәреләчәк. Быел җиһазларны кую планлаштырыла – болар балалар аттракционнары, кабартылган су тавы – аквапарк, «Күңелле утраучык» балалар лабиринты, батутлар, теннис һәм бильярд өстәлләре, аэрохоккей өстәлләре, зонтлар белән шезлонглар, чатырлар, ике сауна, чүп савытлары, эскәмияләр, җәмәгать бәдрәфләре, душ баганалары, киенү-чишенү өчен кабиналар.
Шулай ук пляжда коткару вышкалары бар.
Үзәк пляжда «Дулкын» дип аталган җәйге ресторан ачылды.
Су акваториясе территориясендә катамараннар, бер кешелек һәм ике кешелек резин көймәләр урнаштырыла.
2025 елда шәһәр халкын һәм туристларны ял иттерү өчен кунак йортлары, ел әйләнәсе эшли торган бассейн, ел әйләнәсе эшли торган гөмбәзле ресторан төзү планлаштырыла.
Бу хезмәтләр барысы да түләүле, әмма Чулман елгасына керү юлы ирекле дип вәгъдә итә эшмәкәр. Аның сүзләре буенча, «проект Казан дәрәҗәсендә» Татарстан Республикасы Рәисе Рөстәм Миңнеханов белән килешенгән.
Илшат Шәрифуллин ассызыклаганча, пляжда биналарны һәм корылмаларны төзегәндә кулланылучы барлык төзү конструкцияләре һәм бизәкләү материаллары югары дымлылыктагы су мохитының тискәре йогынтысына каршы торучан.
Пляж территориясендә күп агачлар утырту һәм булган үсемлекләрнең күп өлешен саклау планлаштырыла. Пляжда автомобильләр һәм туристлар йөртә торган автобуслар керү юлларын җиһазлыйлар (автотранспортларга туктау урыннары булыр дип фаразлана), ул җәяүлеләргә якын килү һәм аска төшү өчен җайлы итеп эшләнәчәк.
Билгеле, инфраструктураның мондый үсеше пляжга эш күләмен арттырачак, бирегә күп кешеләрне җәлеп итәчәк. Ә менә пляжны, яр буйларының чисталыгын системалы рәвештә кем күзәтеп торачак – бу сорау әлегә ачык кала.
