Чистайның гүзәл урыннары

Чистай актив үсә, киңәя, шәһәрдә заманча иҗтимагый киңлекләр барлыкка килә, анда чистайлылар буш вакытларын рәхәтләнеп үткәрәләр, шәһәр кунаклары да шунда киләләр. Күптән түгел генә барлыкка килгән, әмма шәһәр халкы яратып өлгергән урыннар турында сөйлибез.

Үзәк мәйдан

Чистайның үзәк мәйданын күпләр шәһәрнең йөрәге дип атый. Ул 2021-2022 елларда сизелерлек үзгәрде. Үзгәртеп төзекләндерү ике этапта узды: башта мәйданның үзен, аннары юл аша җәмәгать киңлеген («Чистай» мәдәни үзәге каршында) төзекләндерделәр. Шәһәр халкының күбесе яңартылган территорияне бәяләде: биредә һәрвакыт эскәмиядә утырып ял итүче кешеләрне, колясканы этеп йөрүче яшь әниләрне, яшьләрне күрергә була. Ә Яңа ел бәйрәмнәрендә бу иҗтимагый киңлек бик күп гирляндалар белән балкый.

«Яшьлек» пляжы

Чистайда яңа «Яшьлек» пляжы быел гына барлыкка килде һәм бу күпчелек халык өчен күптән көтелгән вакыйга булды. Озак еллар дәвамында бездә заманча җиһазландырылган, барлык таләпләргә җавап бирә торган пляж булмады, ә бит шәһәр елга ярында урнашкан. Хәзер бу урынны танып булмый. Биредә балалар өчен аерып алынган территория бар, анда кабартылган таучыклар, батутлар һәм күпкатлы уен комплексы — лабиринт бар. Вакытны тыныч үткәрү өчен ятаклар һәм зонтлар белән җиһазландырылган урын бар, җәйге йортлар төзелгән, аларны пляжда ял иткән вакытта арендага алырга мөмкин. Биредә шулай ук катамараннар, су велосипедлары һәм каяклар прокаты оештырылган, сауна төзелгән, бильярд һәм аэрохоккей уйнарга, кафеда тәмле итеп тамак ялгарга мөмкин. Әйтергә кирәк, төзекләндерү эшләре киләсе елда да дәвам итәчәк.

«Наречье» яр буе

Чулман ярындагы яңа һәм заманча урын соңгы берничә ел дәвамында этаплап төзекләндерелде. Мондый иҗтимагый киңлек барлыкка килүгә күп кенә чистайлылар шат: кайчандыр ташландык хәлдә калган Чулман яр буе уңайлы зонага әверелде. Яр буенда балалар мәйданчыгы, кояштан саклану өчен күләгәле корылмалар, понтоннарда суга чыгу урыны, кояш ванналары кабул итү өчен ятаклар, күргәзмә һәм сәхнә зоналары һәм башка функциональ территорияләр төзекләндерелгән. Проектның концепциясе шәһәр халкының теләкләрен исәпкә алып эшләнде. Хәзерге вакытта яр буенда тагын бер участок төзекләндерелә.

«Татнефть-Олимп» стадионы

Стадион территориясе зур һәм каралган. Һәм сүз футбол кыры турында гына бармый. Стадионның керү зонасында бик күп төрле мәйданчыклар җиһазландырылган: таучыклары һәм батутлары булган балалар шәһәрчеге, зур булмаган ачык
сәхнә, япма астындагы уңайлы эскәмияләр, чәчәк түтәлләре… Болар барысы да башка ял итү зонасы белән гармонияле рәвештә тоташа, анда яшүсмерләр шулай ук вакытларын файдалы үткәрәләр. Яшь чистайлылар өчен анда скейт-парк, аркан юлы һәм башка бик күп нәрсәләр төзекләндерелгән. Стадион спорт вакыйгаларын гына түгел, ә мәдәни-массакүләм чараларны да җәлеп итү урыны булып тора.