Тере чәчәкләр сатып алганда нәрсәгә игътибар итәргә

Сатып алыр алдыннан чәчәкләрне әйбәтләп карагыз
Чәчәкләр – нәфис һәм тиз шиңә торган товар, шуңа күрә аларны озаграк саклау өчен сатып алгандагы халәтенә игътибар итәргә, чәчәкләрне әйбәтләп тикшереп чыгарга кирәк. Алар саф, чиста, әлеге сортка хас булган буяулар һәм чәчәк ату формасында булырга тиеш. Чәчәк ярым ачылган яисә тулысынча ачылган булырга, ә ботагы нык һәм кыйшаймаган булырга тиеш. Корткычлар, авырулар һәм агулы химикатлар ярамый.
Яңа чәчәк бөресе зарарланмаган, каты, шома, тыгыз булырга тиеш.

Чәчәкләрне табигый төсмерләр белән, химик буяуларсыз сайларга кирәк.

Ботаклар, яфраклар зарарланган булырга тиеш түгел. Бөреләре резинкалар белән тарттырылган һәм скотч белән чорналган булырга тиеш түгел.

Селкетеп караганда таҗлар һәм яфраклар коелырга тиеш түгел. Яхшы чәчәк бөгелеп тормаска тиеш.

Киңәш. Әзер букетны сатып алганда, аны яхшылап тикшерегез, чөнки матур төргәк астында шиңгән чәчәкләр яшеренергә мөмкин. Чәчәк бәйләмен сезнең алда төзесәләр, яхшырак була.

Чәчәк бәйләмнәре сатып алганда кулланучыларның хокуклары
Әзер букетны алганда, яңа өзелгәннәрен дә исәпкә алып, сатучы сатып алучыга товар һәм аны җитештерүче турында дөрес мәгълүмат бирергә тиеш.
Бу дөрес сайлап алу өчен кирәк. Әгәр касса чегы яисә электрон документ төре һәм төсләрнең төрлелеге турында мәгълүмат бирмәсә, сатып алучы таләбе буенча сатып алучының исеме, сату вакыты, бәясе һәм җаваплы кеше имзасы белән товар чегы бирелергә тиеш.
Чәчәкләрне дистанцион сатып алганда сатучы товар турында сайт, каталоглар, бук­летлар, фотографияләр һәм башка материаллар аша тулы мәгълүмат бирергә тиеш. Букетлар фотографияләре сатып алучыныкы белән тулысынча тәңгәл килергә тиеш. Киресенчә булганда, кулланучыларны яклау турында закон нигезендә, сатып алучы чәчәкләр һәм аны китерткән өчен акчаны кире кайтаруларын таләп итәргә хокуклы.

Чәчәкләр тиешле сыйфатта булмаса нәрсә эшләргә?
Әгәр дә сатып алучыга сыйфатсыз чәчәкләр сатканнар икән (сабаклары яисә бөреләре сынган очракта, букетта составы һәм төсләр саны туры килмәсә), аның түбәндә әйтелгәнчә эшләргә тулы хакы бар:
•товардан баш тартырга һәм акчаны кире кайтаруларын таләп итәргә;
•төсләрне шуңа охшашларга яисә бәясе туры килгәннәргә алмаштырырга;
•сатып алу бәясен киметергә;
•чәчәкләр бәясен һәм китерү бәясен кире кайтарырга.
Шул ук вакытта сатып алучы кимчелекләре булган товарны сатып алучы таләбе буенча аның хисабына кире кайтарырга тиеш. Товарның сыйфаты курьер гаебе буенча да булырга мөмкин. Бу шулай ук сату-сатып алу килешүен өзү өчен нигез булып тора.

Букетның тиешле сыйфатка туры килмәвен ничек исбатларга
Җитешсезлек­ләрне раслау өчен букетны фотога яисә видеога төшерергә тәкъдим ителә. Аннары дәгъва хаты язарга һәм аны тапшыру турында хәбәр белән заказлы хат аша сатучының юридик адресына җибәрергә кирәк. Шулай ук дәгъваны заказ ясалган сайтта яисә кушымтада калдырырга мөмкин. Дәгъва ике нөсхәдә рәсмиләштерелә: берсе сатучыга бирелә, икенчесе алу турында билге салынып кулланучыда кала.

Акчаны кайтару яисә алыштыру
Сатучы сыйфатсыз товар өчен акчаны таләп итү вакыты башланганнан соң 10 көн эчендә кайтарырга тиеш. Әгәр дә товар кыйммәтләнсә, кулланучы бәяләрдә аерманы таләп итәргә мөмкин. Товарны алыштыру 7 көн дәвамында үткәрелә, кирәк булганда товарның сыйфатын тикшерү 20 көн дәвам итә. Сатучының таләпне үтәүне кире кагуы судка мөрәҗәгать итәргә нигез булып тора.

Мөһим! Әгәр дә сатучы товарның үзенчәлекләре һәм сыйфатны саклау өчен гамәлләре турында вакытында хәбәр иткән булса, кулланучы әлеге тәкъдимнәрне бозса, ул чәчәк бәясен кире кайтаруны таләп итә алмый.

Чәчәкләрне ничек озак сакларга

Тере чәчәкләрдән ясалган букетны саклау зур игътибар һәм гади генә, әмма мөһим кагыйдәләрне саклауны таләп итә. Сезнең чәчәкләрегезнең гомерен озайтырга ярдәм итүче берничә киңәш тәкъдим итәбез:

Вазаны әзерләү. Чис­та вазадан башлагыз. Вазада калган үсемлек калдыклары, бактерияләр чәчәкнең шиңүен тизләтергә мөмкин. Вазаны юуучы чаралар ярдәмендә яхшы итеп юыгыз һәм җылы су белән чайкатыгыз.

Сабакларын кисү. Чә­чәк­не суга кую алдыннан, сабакларын 45 градуска почмак­лап кисегез. Бу суны сеңдерү мәйданын арттыра. Аны үткен кайчы яисә секатор белән кисегез, болай эшләгәндә сабакның тукымалары зарарланмаячак. Кисүне 2-3 көн саен кабатлагыз.

Артык яфраклар. Яф­рак­ларның суга тиеп тормау­ларына ышаныгыз, чөнки бу бактерияләр үрчүенә китерәчәк. Суга тиеп торучы яфракларны өзегез.

Чиста су. Вазаны чиста, салкынча су белән тутырыгыз. Бактерияләр үрчүен бетерү өчен суны 1-2 көн саен алмаштырыгыз. Суны алмаштырыр алдыннан сабакларны агып тора торган суда юыгыз.

Тукландыргыч мат­дә­ләр. Күп кенә чәчәк­ләр тукландыргыч сыекча салынган пакетлар белән сатыла. Аны суга инструкциядә күрсәтелгәнчә өстәгез. Әгәр дә андый пакет юк икән, өйдә булган нәрсәләрне, мәсәлән, бер литр суга берничә тамчы лимон согы яисә бер бал кашыгы шикәр комы кулланырга мөмкин. Бу исә чәчәкләргә озаккарак шиңмичә сакланырга ярдәм итәчәк.

Урынны дөрес сайлау. Чәчәкләр белән вазаны туры кояш нурларыннан, җылыткыч приборлардан һәм үтәли җилләрдән ерак булган салкынча урынга куегыз. Шулай ук җиләк-җимеш янәшәсендә тотмагыз, чөнки алар тиз шиңүгә китерүче этилен бүлеп чыгаралар.

Су бөркү. Кайбер чәчәк­ләр, мәсәлән, розалар һәм лилияләр дым яраталар. Аларның таҗларын саклау өчен пульверизатор белән су сиптерергә мөмкин. Әмма моны бархат таҗлы чәчәкләр, әйтик, тюльпаннар өчен кулланырга ярамый.

Шиңүче чәчәкләрне карау. Әгәр берничә чәчәк шиңә башлады икән, аларны башкаларны да зарарламасын өчен букеттан алырга кирәк, Бу шулай ук композициянең матурлыгын сакларга ярдәм итәчәк.