Никита Курочкин гер спорты буенча Россия беренчелегендә бронза яулады

12 февральдән 16сына кадәр Новосибирск шәһәрендә егетләр һәм кызлар арасында гер күтәрү буенча Россия беренчелеге узды.

Ярышларда илнең 38 төбәгеннән 600дән артык спортчы катнашты. Турнирда Чистай данын «Татнефть Олимп» спорт мәктәбе спортчылары яклады, алар лаеклы нәтиҗәләр күрсәттеләр.
Зуррак яшьтәге яшүсмерләр арасында Никита Курочкин каты көрәштә бронза медаль яулап, турнирда иң яхшыларның берсе булды. Кече яшүсмерләр категориясендә Глеб Якимов, югары әзерлек дәрәҗәсен һәм җиңүгә омтылышын күрсәтеп, 4нче урынны алды.

Кызлар Камилла Киселева һәм Вероника Сергеева мондый югары дәрәҗәдәге турнирда беренче тапкыр чыгыш ясадылар һәм беренче разряд нормативларын уңышлы үтәделәр.
Спортчыларыбызны яхшы нәтиҗәләре белән котлыйбыз! Аларга киләчәктә дә уңышлар, яңа казанышлар һәм спорт аренасында якты җиңүләр телибез.