Мошенникларга 50 миллион сумнан артык акча биргәннәр

Җинаять эше ачу белән куркыталар, акчаны «куркынычсыз счетка» күчерергә, инвестицияләрдә акча эшләргә, бәлагә эләккән туганнарына ярдәм итәргә тәкъдим итәләр… Мошенниклар кешеләрдән алдап акча алу өчен яңадан-яңа ысуллар уйлап табалар. Ни кызганыч, бу килеп чыга да.
Россия Эчке эшләр министрлыгының Чистай районы буенча бүлеге мәгълүматларына караганда, 2024 елда кизү частенда IT-технологияләр кулланып, читтән торып кылынган 185 мошенниклык һәм банк счетларыннан 33 урлашу очрагы теркәлгән. Шәһәр һәм район халкына китерелгән зыян, 2023 ел белән чагыштырганда, 48 000 000 сумнан 54 000 000 сумга кадәр арткан. Банк карталарыннан мошенниклар 1 933 381 сум акча алганнар. Саннар җитди!
— Соңгы елларда бүлек эшчәнлегендә иң проблемалы мәсьәләләрнең берсе булып мәгълүмати-коммуникацион технологияләр кулланып кылынган җинаятьләргә каршы тору кала, — дип билгеләп үтте Россия Эчке эшләр министрлыгының Чистай районы буенча бүлеге начальнигы урынбасары, эчке хезмәт подполковнигы Антон Ерашов. — Даими рәвештә үткәрелә торган кисәтү чараларына, эшче коллективларда әңгәмәләр үткәрүгә, шәһәр һәм район халкына массакүләм мәгълүмат чаралары аша мошенниклык, җинаятьләр турында актив мәгълүмат бирүгә карамастан, ни кызганыч, алар кимеми.
Антон Сергеевич интернет-аферистларның нинди хәйләләренә кешеләрнең ешрак эләгүе һәм җинаятьчел кул сузулардан ничек сакланырга икәнлеге турында җентекләп сөйләде.

Акчаны «куркынычсыз счетка» күчерү
Мошенниклыкның иң киң таралган схемасы булып таныш булмаган кешенең телефон аша үзен банк хезмәткәре дип таныштыруы һәм шикле банк операциясен гамәлдән чыгару сылтавы белән гражданнарның конфиденциаль мәгълүматын алуы, яки акчаны «куркынычсыз счетка» күчерүне соравы тора. Нәтиҗәдә, кешеләр үз акчаларыннан мәхрүм кала.

Файлларны саклау программасы
Популярлык буенча икенче урында дистанцион ысул тора, җинаятьченең максаты әңгәмәдәшне компьютерга яки телефонга кәрәзле телефонда яки компьютерда саклана торган файлларга рөхсәтсез керү омтылышларын булдырмаска мөмкинлек бирә торган программа урнаштырырга ышандырудан гыйбарәт. Зыян күрүчеләрнең телефонына керү мөмкинлеге алгач, мошенниклар банкның шәхси кабинетына керә һәм счеттан бөтен акчаларны салдыра.

Туганы бәлагә эләккән
Тагын бер ысул — бу сезнең туганыгыз бәлагә эләккән, юл-транспорт вакыйгасының корбаны яки гаепләнүчесе булган дигән хәбәр. Мошенниклар гражданнарны үз туганнарына ярдәм итү өчен курьер аша акча бирергә күндерә.

Кәрәзле элемтә операторы белән килешүне озайту
Шулай ук мошенниклар үзләрен кәрәзле элемтә операторлары итеп таныштыралар, хезмәт күрсәтүгә килешүне озайту кирәклеге турында хәбәр итәләр, моның өчен СМС-хәбәрдә килгән кодны әйтүне сорыйлар. Аннары янәсе Дәүләт хезмәтләре порталы һәм банк хезмәткәреннән шалтыратулар килә. Шалтыратучылар банк счетларында шикле активлык турында хәбәр итәләр һәм бар булган акчаны «куркынычсыз счетка» күчерергә тәкъдим итәләр.

Инвестицияләр яки өстәмә керем
Чистайлыларның күбесе үз акчаларын уңышсыз инвестицияләгәннән соң полициягә мөрәҗәгать итәләр. Инвестицияләү яки Интернет челтәрендә өстәмә акча эшләү — мошенниклык кылуның тагын бер ысулы.

Бушлай белдерүләр сайтында сатып алулар
Еш кына гражданнар бушлай белдерүләр сайтларында яки интернет-кибетләрдә товарны сатып алганда яки сатканда мошенниклар корбанына әвереләләр. Гражданнар товарны кызыктыргыч бәядән күргәч, аны сатып алырга тырышалар. Сатучы акчаның бер өлешен алдан күчерүне сорый. Сатып алучы кирәкле сумманы күчергәч, сайтта күрсәтелгән мошенникларның телефоннары җавап бирми башлый.

Федераль иминлек хезмәте «хезмәткәрләре»ннән шалтыратулар
Соңгы вакытта чистайлыларга янәсе Федераль иминлек хезмәте хезмәткәрләреннән террорчыларга булышлык күрсәткән өчен җинаять җаваплылыгына тартылачаклар дигән янаулар килә башлады.
Гыйнварда «Телеграм» мессенджерында Чистай пенсионеры элеккеге эш бирүчедән оешма хезмәткәрләренең шәхси мәгълүматлары таралуы һәм аңа
16:23

тикшерүгә ярдәм итәргә кирәклеге турында хәбәр алган. Аннары «Федераль иминлек хезмәте хезмәткәре» шалтыраткан.
Үзен таныштырып, шалтыратучы аның террорчыларга булышлыкта шикләнелүен хәбәр итә, чөнки янәсе аның счетыннан акчалар террорчылык оешмасы счетына күчерелә. Моның өчен җинаять җәзасына тартылырга мөмкин булуы һәм тикшерү белән хезмәттәшлек итмәсә, кулга алыначагы турында яный.
Шалтыратучылар бик тупас сөйләшәләр, куркыталар, басым һәм янаулар астында кредитлар рәсмиләштерергә һәм акчаларны «куркынычсыз счетларга» күчерергә таләп итәләр. Куркуга калып, пенсионер ханым ялган Федераль иминлек хезмәте хезмәткәренең барлык күрсәтмәләрен үтәгән.

«Әгәр сезгә ят кеше шалтырата икән, трубканы куегыз!»
— Мошенниклык кылу ысуллары бик күп, шуңа күрә гражданнарны, беренче чиратта, билгесез номердан шалтырату килгәндә, бик уяу булырга чакырабыз. Әгәр кеше сезгә таныш булмаса, трубканы куегыз. Әгәр дә сезне берәр нәрсә кызыксындырган икән, шалтырату кергән оешмага шалтыратыгыз, кызыксындырган сорауларны бирегез. Исегездә тотыгыз, мошенниклар башкаларның күрсәтмәләрен үтәргә риза булган ышанучан кешеләргә исәп тоталар. Беркайчан да шәхси мәгълүматларыгызны аз таныш һәм таныш булмаган кешеләргә тапшырмагыз, шик тудыручы түбән бәядән товар сатып алмагыз, сезгә смс, электрон почта яки телефон аша хәбәр ителгән мәгълүматны тикшерегез. Шәһәр һәм район халкын уяу булырга, мошенниклык ысуллары турында туганнарыгыз белән тагын бер кат сөйләшергә чакырабыз, — дип мөрәҗәгать итте чистайлыларга Антон Ерашов.
Әгәр сез мошенниклык гамәлләренең корбаны булсагыз, кичекмәстән Россия Эчке эшләр министрлыгының Чистай районы буенча бүлегенең кизү частенә 02, 112, 102 телефоннары аша хәбәр итегез.