Керем аласы килгән, әмма миллионга якын акчасыннан колак каккан

Зыян күрүче Телеграм каналда бер ир-ат белән танышуы, аның актив аралашуы, үзе турында сөйләве һәм хәтта шәхси очрашуга килергә теләве турында хәбәр итә. Берничә көннән әлеге ир-ат бер платформада инвестицияләр белән шөгыльләнүен әйтә, әлеге ханымга да югары керем вәгъдә итеп, бу эшкә кушылырга тәкъдим итә. Озак та үтми әлеге хатын-кыз белән аның «танышы» элемтәгә чыга, янәсе бу тәҗрибәле инвестор. Ул аңа платформада теркәлергә, верификация үтәргә ярдәм итә, 250 доллар күләмендә беренче взносны кертергә үгетли.
— Хатын-кыз «уңышлы киле­шү­ләр»нең скриншотларын күрә, озакламый керем аласына ышанып, криптовалюталы опеацияләрдә дә катнаша. Әмма саллы сумма керткәннән соң мошенниклар аңа экран демонстрациясен кабызуын үтенәләр һәм шул вакытта аның счетыннан бөтен акчасын урлыйлар, — дип сөйләделәр Россия эчке эшләр министрлыгының Чис­тай районы буенча матбугат хезмәте бүлегендә.
Үзенең алданганлыгын аң­лап, ул инвестицияләр турында мәгълүматлы танышы ярдәмендә акчасын кире кайтарырга тели. Әмма счетта бары тиеннәр генә калган була. Гомуми зыян 930 000 сум тәшкил итә.
Россия эчке эшләр министр­лыгының Чистай районы буенча бүлек тикшерүчесе РФ ҖК 4 бүлеге, 159 маддәсе буенча җинаять эше ачты («Мошенник­лык»).
Полиция кисәтә: интернет­тагы финанс тәкъдимнәре бе­лән сак булыгыз! Мошенниклар еш кына гарантияләнгән табыш белән «җиңел акча» яисә «файдалы инвестицияләр» тәкъдим итәләр. Акчагызны салыр алдыннан белгечләр белән киңәшегез яисә бу өлкәдә белемегезне арттырыгыз.