Дмитрий Арзин кышын бәкедә су коена

Кышын бәкедә су коену – бу экстремаль мавыгу гына түгел, ә үзеңнең сәламәтлегеңне ныгыту, тәнеңне һәм рухыңны чыныктыру да.
Бүген без сезне чистайлы Дмитрий Арзин белән таныштырабыз. Ул менә 9 ай инде бәкедә су коену белән мавыга. Дмитрий үзенең тәҗрибәсе белән уртаклашты, бу эшне башларга теләүчеләргә киңәшләрен бирде.

– Барысы да гадәти күнек­мәләр залыннан башланды,– дип сөйли Дмитрий. –Мин үзенең бәкедә коену мавыгуы турында сөйләүче ир-атны күреп алдым. Ул бозлы суда коена, әмма аның коену урынына барырга машинасы юк икән. Миннән үзен алып баруын сорады. Шулай итеп мин яр буена барып эләктем һәм аның ничек итеп курыкмыйча салкын суга чумуын күзәттем. Шул вакытта мин дә: «Ә нигә әле миңа да шулай эшләмәскә?» дип уйлап куйдым.

Дмитрий беренче тапкыр былтыр җәен чума.
– Мин яр буенда басып торганда йөрәгемнең чыгардай булып типкәнен сиздем. Тәнем дә куркудан куырылып килде. Башымда: «Әгәр булдыра алмасам? Минем хәлем начарайса?» дигән уйлар бөтерелде. Әмма мин тәвәкәлләдем һәм бер адым алга атладым, – дип сөйли Дмит­рий.
Ул вакыттагы тәүге кичереш­ләрен шактый вакыт үтсә дә, әле дә яхшы хәтерли ул.
– Суда беренче секундларымда шок булды. Тәнемә мең инә кадалгандай тоелды, сулавым авырайды, ә йөрәк урыныннан чыгардай булып сикерде. Ә судан чыккач тәнем аңлатып булмастай җиңеләеп калды, тире буйлап ниндидер җылылык таралды, – дип искә төшерә Дмит­рий.
Хәзер 9 ай вакыт узгач, ул ышанычлы рәвештә үзенең уй-кичерешләре белән идарә итәргә өйрәнүе хакында әйтә.
– Мин озакка сузмыйм: чише­нәм, аз гына күнегүләр ясыйм да, шунда ук суга чумам. Беренче 20-30 секундта тән: «Син нәрсә эшлисең?» дип кычкыра. Аннары салкынлык түзәрлек хәлгә килә. Бу үз-үзеңне җиңдең дигән сүз инде, – дип сөйли ул.
Бәкегә чуму Дмитрийның тормышын үзгәртә. Бу айларда ул салкын тию, йөткерү, томау төшүләрне оныта. Аның тәне ныгый, ә психикасы тотрыклана.
– Авыр эш көненнән соң бозлы су киеренкелекне бетерә. Ачу килү, арулар барысы да суда кала, – дип уртаклаша ул.
– Бу мавыгу белән яңа гына шөгыльләнә башлаучыларга нәрсә киңәш итәр идегез?
– Бик тиз һәм кисәк кенә чумарга тырышмагыз. Аз-азлап башлагыз: салкын душка керегез яисә азлап кына чумып алыгыз. Тиз генә бәкегә чумарга кирәкми. Үз тәнегезне тыңлагыз – уңайсызлык сизсәгез, судан чыгыгыз. Бу ярыш түгел, үзең турында кайгырту. Иң элек табиб белән киңәшегез. Шул ук вакытта кирәк булганда ярдәм итәрлек тәҗрибәле остаз булуы да кирәк. Салкын суда коенуның организмга җитди киеренкелек икәнен онытмагыз, ул бар кешегә дә килешеп бетмәскә дә мөмкин. Фикердәшләр табыгыз: миңа мәсәлән, мине хуплаучы һәм рухландыручы кешеләр очрады. Иң беренче чиратта моның белән үзегез һәм сәламәтлегегез хакына шөгыльләнегез, – дип киңәш бирә Дмитрий.
Безнең әңгәмәдәшебез салкын суда коенуның спорт төре яисә гади чыныгу гына түгеллеген ассызыклый. Дмитрий өчен бу – үз чикләреңне белү, куркуны җиңү һәм эчке көчеңне табу ул.
– Мин коенуны дәвам итәргә уйлыйм, әмма хәзерге кебек еш булмастыр. Планда кышкы йөзү буенча ярышларда 200 метр арага йөзү, – ди Дмитрий. (Редакциядән: быел кышкы йөзү буенча Әлмәт шәһәрендә үткән кышкы йөзүләрдә Дмит­рий 100 метр араны узып II урын яулаган).

Анна Глазкова