Депутатлар шәһәр бюджетындагы үзгәрешләрне расладылар

Депутатлар тикшергән беренче мәсьәлә 2024 елга һәм 2025-2026 елларның планлы чорына шәһәр бюджетына үзгәрешләр кертүгә кагылды. Бу темага доклад белән муниципаль районның финанс-бюджет палатасы җитәкчесе Наталья Карманова чыгыш ясады.
— Үзгәрешләр кире кайтарылмый торган кертемнәрне 153 миллион сумга арттыру өлешенә кагылды. Алар май указларына һәм бюджет оешмаларында хезмәт хакы буенча түләүләргә кагыла. Моннан тыш, «Иң төзек шәһәр» конкурс нәтиҗәләре буенча акча керде. Чистайга керем чыганакларыннан шулай ук 728 мең сум күләмендә иганә керде, алар индустриаль мәйданчыкта техник тоташтыруга бәйле чыгымнарны түләү өчен каралган, — дип сөйләде Наталья Анфиногентовна.
Доклад ясаучы шулай ук карар проектында тәкъдим ителгән шәһәр бюджетының керем өлешенә кагылышлы кайбер үзгәрешләрне яңгыратты.
Торглар уздырмыйча гына сатыла торган җир участокларының бәясен, җир участоклары өчен аренда түләве күләмен билгеләү тәртибе һәм хосусый милектәге җир участокларын шәһәр милкендәге җир участоклары белән яңадан бүлү нәтиҗәсендә аларның мәйданын арттырган өчен түләү күләмен билгеләү тәртибе һәм җир участокларына карата сервитут билгеләү турындагы килешү буенча түләү күләмен билгеләү тәртибе турындагы нигезләмәләрне раслау хакында җир һәм мөлкәти мөнәсәбәтләр палатасы җитәкчесе Марина Исхакова сөйләде.
Депутатлар каравына шәһәр төзелешен проектлауның җирле нормативларын раслауга кагылышлы карар проекты чыгарылды. Бу темага доклад белән муниципаль район башкарма комитетының архитектура һәм шәһәр төзелеше бүлеге башлыгы Андрей Шумилов чыгыш ясады.
Шәһәр башкарма комитеты җитәкчесе Илдар Рәхимов депутатларга гамәлдәге законнарга туры китерү максатында шәһәрне төзекләндерү кагыйдәләренә үзгәрешләр кертү буенча карар проектын тәкъдим итте.
Утырышның көн тәртибендәге бишенче пункты 2025 елга шәһәр Советының һәм аның даими депутат комиссияләренең эш планына кагылышлы мәсьәлә иде. Бу хакта шәһәр башлыгы урынбасары Михаил Ксенофонтов хәбәр итте.
Барлык биш мәсьәлә буенча да депутатлар раслау карарлары чыгарды. Утырышны тәмамлап, муниципаль район башлыгы Дмитрий Иванов барысына да нәтиҗәле хезмәтләре өчен рәхмәт белдерде.
— Куелган барлык бурычлар сыйфатлы һәм нәтиҗәле башкарылды: төзелештә дә, капиталь ремонтта да, икътисадта да җитди үсеш күзәтелә. Бу елның 11 аенда район предприятиеләре тарафыннан 42 миллиард сумлык продукция төяп озатылган, бу алдагы ел күрсәткечләреннән күбрәк. Шуңа да карамастан, алда тагын да җитдирәк бурычлар тора, — дип билгеләп үтте Дмитрий Алексеевич.