Чистай муниципалитетында узган киңәшмәнең төп темасы хатын-кызлар консультациясе һәм перинаталь үзәк эше булды

Аны муниципаль район башлыгы Дмитрий Иванов алып барды. Ул киңәшмәне яңа билгеләнү турындагы хәбәрдән башлады. 5 февральдән «Чистопольгаз» эксплуатация-җитештерү идарәсе башлыгы итеп Рәшит Сибгатов билгеләнде.

Безнең перинаталь үзәк – Идел буе федераль округында иң яхшыларның берсе
2024 елда хатын-кызлар консультациясе һәм бала тудыру йорты эше турында хатын-кызлар консультациясе мөдире, бала тудыру буенча баш табиб вазифаларын башкаручы Гөлнара Карлышева хәбәр итте. Бүгенге көндә хатын-кызлар консультациясендә 3 акушер-гинеколог эшли, 6 шәһәр һәм 1 авыл участогында хатын-кызлар кабул ителә. Эшнең төп юнәлешләре булып йөкле хатын-кызларны алып бару, гинекологик пациентларны кабул итү тора, гаиләне планлаштыру кабинеты эшли.
2024 елда 514 йөкле хатын-кыз күзәтү астында булган, 2023 елның шул ук чорында – 511. Вакытыннан алда бала табуны узган елда 18 очракка кадәр киметергә (3,7 %) мөмкин булган, 2023 елда бу күрсәткеч 24 очрак (5,1%) тәшкил иткән. Үзеннән-үзе бала төшү саны – 2023 елда 56 очрактан 2024 елда 45 очракка кадәр кимегән. Әмма патологик йөклелек саны 2023 елда 72 очрактан 2024 елда 80 очракка кадәр арткан.
Демографик күрсәткечләрне яхшырту максатларында узган елда хатын-кызлар консультациясе базасында муниципальара «Кризислы йөклелек үзәге» ачылган. Консультациягә йөклелекне өзәргә теләгән хатын-кызлар җибәрелә. Алар белән психолог, социаль хезмәткәр, юрист, хатын-кызлар консультациясе мөдире эшли.
Чистай бала тудыру йорты якын-тирә районнар беркетелгән 2нче дәрәҗәдәге перинаталь үзәк булып тора. Узган елда анда 612 бала туган, бу 2023 елга караганда 115кә кимрәк. Вакытыннан алда бала табу проценты – 3,7% һәм оператив бала табу саны – 41% элекке дәрәҗәдә калган. Билгеләп үтелгәнчә, узган елда иртә неонаталь үлемнең бер генә очрагы да булмаган, 2023 елда – 1 очрак.
Узган ел Чистай перинаталь үзәге Идел буе федераль округының 2нче дәрәҗәдәге иң яхшы перинаталь үзәк буларак III урын өчен бүләкләнгән.

Савым бер тоннага арткан
Агросәнәгать комплексындагы эшләрнең торышы турында авыл хуҗалыгы һәм азык-төлек идарәсе башлыгы Александр Ромадановский хәбәр итте. Узган атнада районда 368 тонна сөт савылган. Моннан алдагы хисап чорына карата үсеш – 1 тонна, аңа нигездә фермер хуҗалыклары, «Молко» һәм «Кулон Агро» предприятиеләре хисабына ирешелгән. 15,8 миллион сумлык 349 тонна сатылган. Сөтнең уртача бәясе – 45 сум 40 тиен.
Мөгезле эре терлекләр үрчетү эше дәвам итә, бер атнада районда 49 бозау туган.
Район хуҗалыклары язгы чәчүгә әзерләнүләрен дәвам итәләр. Россельхозцентр орлык материалын тикшерүне төгәлләде. Техниканы ремонтлау, минераль ашламалар туплау эшләре алып барыла.

3 машина йөртүче руль артына исерек килеш утырган
Оператив хәл турында Эчке эшләр министрлыгының оператив эш буенча бүлек начальнигы урынбасары Җәмил Әхмәтҗанов хәбәр итте. Бер атна эчендә җинаятьләр турында 11 хәбәр теркәлгән. Сводкада – 4 мошенниклык, 2 урлашу, наркотик матдәләр саклау, исерек килеш автомобиль белән кабат идарә итү, иреген чикләүне үтәүдән качу очраклары.
Бер атна эчендә 25 юл-транспорт вакыйгасы килеп чыккан, бу моннан алдагы атнага караганда 9 очракка күбрәк.
Барлыгы административ хокук бозулар өчен 194 кеше җаваплылыкка тартылган, шул исәптән юл йөрү кагыйдәләрен бозган өчен – 160. Транспорт чарасын исерек хәлдә йөрткән өчен 3 машина йөртүче тоткарланган.