Балыкны закон бозып сатканнар

Балык продукциясен сату нокталарын тикшерү буенча чираттагы рейд булды. Чараны Роспотребнадзор һәм полиция хезмәткәрләре бергәләп үткәрде. Тикшерү барышында кулланучылар өчен продукциянең сыйфатына һәм куркынычсыз булуына йогынты ясарга мөмкин булган җитди закон бозулар ачыкланды.
Белгечләр балык сатыла торган берничә сәүдә ноктасын тикшерделәр. Төп игътибар санитар нормаларны үтәүгә, кирәкле документлар булуга һәм продукцияне дөрес саклауга бирелде.
— Без берничә закон бозу очрагын ачыкладык. Беренчедән, бу туры килү сертификатлары булмау: кайбер сатучылар балык продукциясенең сыйфатын һәм куркынычсызлыгын раслый торган документларны күрсәтә алмадылар, — дип аңлатты Роспотребнадзорның ТР буенча территориаль бүлегенең әйдәп баручы белгеч-эксперты Елена Меркушина. — Икенчедән, тиешенчә сакланмау очраклары ачыкланды, ягъни балык температура режимын үтәмичә сакланган, бу исә продуктның бозылуына китерергә һәм кулланучылар сәламәтлеге өчен куркыныч тудырырга мөмкин. Өченчедән, продукциянең бер өлешендә маркировка юк: балыкның килеп чыгышы, җитештерүче һәм аның энергетик кыйммәте турында мәгълүматлар күрсәтелмәгән.
Елена Меркушина билгеләп үткәнчә, мондый рейдлар атна саен координацион совет беркетмәсе нигезендә үткәрелә. Ачыкланган закон бозулар өчен сатучыларга җитешсезлекләрне бетерү таләбе белән кисәтүләр ясала. Җитди бозулар булган очракта материаллар алга таба тикшерү өчен шәһәр судына тапшырыла.

Балык сатып алганда нәрсәгә игътибар итәргә

1. Балыкны санитар нормалар үтәлгән, тикшерелгән урыннардан гына сатып алыгыз.
2. Маркировка һәм озата баручы документлар булуга игътибар итегез.
3. Әгәр сез закон бозылуын күрсәгез, Роспотребнадзорга яки җирле хакимият органнарына хәбәр итегез.

Тикшерүчеләр мондый рейдлар үткәрү базарда продукциянең сыйфатын яхшыртырга һәм кулланучылар хокукларын якларга ярдәм итә, дип ассызыкладылар һәм халыкны балык продукциясен сайлаганда игътибарлы булырга өндәделәр.