91 яшьлек Минач Гыйматдинов фронтка изге гамәлләре белән дә, акча белән дә ярдәм итә

Чистайлылар махсус хәрби операциядә катнашучыларга ярдәм итүләрен дәвам итәләр. «Юлдаш» интернат-йортында яшәүче Минач Гыйматдинов окоп шәмнәре ясауда, парафин тутыру өчен калай банкалар әзерләүдә булыша. Ул аларның очлы кырыйларын кысып тигезли һәм этикеткалардан арындыра.
Минач Гыйматдиновка 91 яшь. Махсус хәрби операция башланганнан бирле сугышчыларга ярдәм итә. Ике ел рәттән Минач Галәветдин улы махсус хәрби операциядә катнашучыларга гуманитар ярдәм ясап 100әр мең сум җибәреп барган. Хәзер дә интернатта яшәүче Минач абый сугышчыларга ярдәм итүен дәвам итә.
— Мин көн дә телевизор карыйм, андагы сугышчыларыбызга ничек авыр булуын аңлыйм. Миңа 30-40 яшь булса, үзем дә анда китәр идем әле. Үз вакытында намус белән хезмәт иттем. Хәзер мин үзем генә, миңа күп акча кирәкми. Мин инде акча җыю яшендә түгел, аннары алар миңа нәрсәгә кирәк соң? Теге дөньяга үзең белән байлыгыңны алып китә алмыйсың. Шуңа күрә дә сугышчыларыбызга булышам. Барлык кеше дә ярдәм итәргә тиеш, — дип сөйли пенсионер.
Окоп шәмнәре өчен әзер­лән­гән банкаларны Минач Гыйматдинов үзе «Чистай — фронтка» хәрәкәте волонтерларына тапшырды. Мебель микрорайо­нының территориаль җәмәгать советында аны «Чистай — фронтка» волонтерлык хәрәкәте җитәкчесе Чулпан Сөләйманова каршы алды. Ул аңа махсус операция барган вакытта нәрсәләр җитештерүләре турында сөйләде, активистлар әзерләп фронтка җибәргән әйберләрне күрсәтте.
Шулай ук волонтер Олег Яр­мө­хәммәтов үзенең хезмәт­тәше белән Донецк госпиталенә гуманитар ярдәм итеп тапшырдылар. Ул бу хакта социаль челтәрләрдә хәбәр итте. Ә медицина училищесы хезмәткәрләре һәм студентлары сугышчыларга бүләкләр һәм күчтәнәчләр җибәрделәр.
14 гыйнвардан 17 гыйнварга кадәр Дмитрий Иванов РФ Кораллы көчләре сафында хезмәт итүчеләргә һәм районыбыздан мобилизацияләнеп, махсус хәрби операциядә катнашучыларга, ЛНР һәм ДНР республикалары халкына гуманитар ярдәм җыюны игълан итте. Озак сак­лану срогы булган азык-төлек, төзелеш материаллары (поликарбонат, полипропилен торбалар, поликарбонат өчен элементлар һәм башкалар) кирәк. Гуманитар ярдәм Бебель урамы 129нчы йорт адресы буенча кабул ителә (муниципаль район башкарма комитеты).